Bada Tazarar haihuwa na rage mace-macen mata – Minista Mamora

Karamin ministan kiwon lafiya Olorunnimbe Mamora ya bayyana cewa samar da isassun dabarun bada tazarar haihuwa zai taimaka wajen rage akalla kashi 30% na mace-macen mata a lokacin da suka zo haihuwa.

Wannan alkaluma na kunshe a jawabin da ministan yayi a wajen taron tattauna hanyoyin samar da isassun dabarun bada tazarar haihuwa a kasar nan da aka yi a makon jiya.

Ya ce bincike ya nuna cewa Najeriya na cikin kasashen duniyan da suka fi samun yawan mace-macen mata wajen haihuwa.

“Bincike ya nuna cewa mata 512 daga cikin mata 1,000 na mutuwa wajen haihuwa a Najeriya.

Matsaloli

Mamora ya ce rashin ware isassun kudade domin samar da dabarun bada tazarar haihuwa na daga cikin matsalolin da ake fama da su a kasar nan.

Ya ce sauran matsalolin sun hada da rashin sani, camfi da yadda wasu mazan basu yadda mace ta bada tazarar haihuwa.

Wayar da kan mutane

Kodinatan shirye-shirye na kungiyar RMCH Emmanuel Lufadeju ya ce sakamakon bincike ya nuna cewa akalla mata kashi 80% basu da ilimin amfani da dabarun bada tazarar haihuwa.

KARANTA:  LUGUDEN WUTA KAN KUDIN MAKAMAI: Wadanda su ka yi kwangilar sun san kan su, su za ku titsiye ba ni ba –Janar Attahiru

A Najeriya mata kashi 15% ne ke amfani da dabarun.